Адылбек Иманалы уулу: Ветеринардык дарылардын сертификаты аны саткан ар бир дарыканада болушу керек

Коом 0

Кыргызстан тоолуу өлкө болгондуктан калкыбыз көбүнесе дыйканчылык жана мал чарбачылык менен алектенет. Фермерлерибиз акыркы кездери асыл тукум мал чарбачылыгына өтүп жатат. Өлкөбүзгө кайсы өлкөлөрдөн ветеринардык дары-дармектер кирип жаткандыгын, аларды сертификаттан өткөрүүнүн жол жобосун билүү үчүн Айыл чарба, тамак-аш өнөр жайы жана мелиорация министрлигинин Ветеринариялык дары-дармек каражаттарын, тоют жана тоют кошулмаларын каттоо жана сертификаттоо боюнча борборунун башкы адиси Адылбек Иманалы уулун кепке тарттык.

- Саламатсызбы. Сиздердин борбор кандай иштерди аткарары тууралуу кыскача айтып берсеңиз?

- Саламатчылык. Биздин борбор ветеринардык дары-дармек каражаттарын каттоо менен иш алып барат. Бизге келип түшкөн ветеринардык дары-дармектер тийиштүү эксперттерге жөнөтүлөт. Андан кийин биздин лабораториядан текшерүүдөн өтүп, сапаты тастыкталат. Лабораториябызда атайын жандыктар бар. Биз аларга эксперимент жүргүзөбүз. Ошонун жыйынтыгы менен каттоо күбөлүгүн беребиз.

- Сиздерден алынган сертификаттын көчүрмөсү милдеттүү түрдө ар бир ветеринардык дарыканаларда болушу зарылбы?

- Сиз туура суроо бердиңиз, сатууга келген ар бир ветеринардык дары-дармектердин сертификаты бардык ветеринардык дарыканада болушу керек. Фермерлерге дары алып жатканда анын сертификатын сураңыздар деп кайрылат элек. Анткени, дарылар аткезчилик жол менен алынып келген болушу мүмкүн.

- Былтыркы жылы канча дарыга сертификат бердиңиздер?

- Өткөн жылы биздин борбор 147 аталыштагы ветеринардык дары-дармектерди каттоодон өткөрдү. Андан сырткары 30 аталыштагы ветеринардык дары-дармектин каттоо документтери токтотулуп, эки тоют кошулмасы техникалык регламенттин талаптарына жооп бербегендиктен артка кайтарылды. 441 аталыштагы дары-дармектер сертификациядан өттү.

- Эгерде, сиздерден каттоодон өтпөгөн дары-дармектер өлкөгө киргизилген учур аныкталса кандай чара көрүлөт?

- Ветеринардык инспекция көзөмөл жүргүзүүчү орган болуп эсептелет. Биз аларга кат менен кайрылабыз, калган иштерди алар жүргүзүшөт.

- Сиздерден сертификат алуунун мөөнөтү канча убакытты түзөт?

- Тийиштүү документтерди топтоп келген соң, биз бир жуманын ичинде ошол дарынын шайкештик сертификатын беребиз.

- Былтыркы жылы Кыргызстанга кайсы өлкөлөрдөн ветеринардык дарылар келди?

- Биздин өлкөгө көбүнчө Россия, Кытай, Беларус жана Украинадан көп дары-дармектер келет.

Пикир

Оставить комментарий