Бишкек, 09.06.22. /Кабар/. Бүгүн, 9-июлда Нарын облусундагы бардык орто мектептерде акыркы коңгуроо аземи салтанаттуу өткөрүлдү. Бул тууралуу президенттин Нарын облусундагы өкүлчүлүгүнөн билдиришти.
Маалыматка ылайык, быйылкы окуу жылында Нарын облусу боюнча 5 миң 132 окуучу 9-классты, 3 миң 710 окуучу 11-классты ийгиликтүү аяктап жатат.
Облус жетекчиси Сабыркул Ашимбаев Нарын шаарындагы М.Сыдыков атындагы №7 орто мектепте уюштурулган майрамдык иш-чарага катышып, бүтүрүүчүлөргө ак жол каалады.
“Урматтуу бүтүрүүчүлөр, сиздер мамлекетибиздин негизги байлыгы, үмүт-тилеги жана келечегисиздер. Өлкөбүздүн жаркын келечеги сиздердин колуңуздарда. Ошондуктан сиздер терең жана ар тараптуу билим алууга, чет тилдерди үйрөнүүгө, ар кыл заманбап кесиптик билимдерди өздөштүрүүгө, мекенчил, намыскөй инсандардан болууга милдеттүүсүздөр", - деди ал өз сөзүндө.
Салтанаттуу иш-чара каалоо-тилектер, бүтүрүүчүлөрдүн ыр-бийлери менен коштолуп, акыркы коңгуроо кагылды.
Пикир
Оставить комментарий