Бишкек, 28.04.22. /Кабар/. Баткенде 59 балага кийим-кече жана акчалай жардам көрсөтүлдү. Бул тууралуу президенттин Баткен облусундагы ыйгарым укуктуу өкүлүнүн басма сөз кызматы билдирди.
Маалыматка ылайык, Баткен шаарында "Баткен Ыйман Нуру" кайрымдуулук фонду тарабынан уюштурулган кайрымдуулук иш-чарасы өткөрүлдү.
Аталган иш-чарага КР президентинин Баткен облусундагы ыйгарым укуктуу өкүлүнүн орун басары Жаныбек Исаков баштаган жергиликтүү бийлик өкүлдөрү жана КР эмгек сиңирген мугалими Гапыр Мадеминов катышты.
Иш-чаранын жүрүшүндө облус башчысынын орун басары сөз сүйлөп, фонд тарабынан жасалып жаткан бүгүнкү жана буга чейинки кайрымдуулук иш-аракеттери үчүн ыйгарым укуктуу өкүл Абдикарим Алимбаевдин атынан ыраазычылык билдирип, фонддун жасап жаткан жакшылык иштерине ийгиликтерди каалады.
Кайрымдуулукка багытталган иш-чаранын алкагында Баткен районунун жана шаарынын аймагынан келген жалпы 59 балага фонд тарабынан кийим-кече жана акчалай жардам көрсөтүлдү. Мындан сырткары, балдарга Баткен облустук китепканасы тарабынан кызыктуу китептер белеке берилди.
Ошондой эле фонд тарабынан шайланган балдардын өкүл ата-энелери тарабынан да белектер тапшырылды.
Белгилей кетсек, бүгүнкү күндө Баткен облусунун аймагында жалпысынан ата-энесинен ажыраган 143 бала болсо, 4 миң 349 жарым жетим балдар бар. Ал эми "Баткен Ыйман Нуру" кайрымдуулук фонду облус аймагында бүгүнкүдөй иш-чараларын байма-бай жүргүзүп келүүдө.
Пикир
Оставить комментарий