Бишкек, 05.11.21. /Кабар/. Бишкекте “Ала-Арча” мамлекеттик резиденциясында премьер-министрлердин деңгээлинде “Европа Биримдиги – Борбор Азия” биринчи экономикалык форуму өтүп жатат.
Иш-чарага Кыргызстандын президенти Садыр Жапаров, КР президентинин администрациясынын жетекчиси – министрлер кабинетинин төрагасы Акылбек Жапаров, Казакстандын премьер-министри Аскар Мамин, Өзбекстандын премьер-министри Абдулла Арипов, Түркмөнстандын вице-премьер-министри Сердар Бердымухамедов жана Тажикстандын вице-премьер-министри Усмонали Усмонов катышууда. Ошондой эле, Европа Биримдиги тарабынан Европа комиссиясынын экономикалык маселелер боюнча вице-президенти Валдис Домбровский жана Европа өлкөлөрүнүн жана эл аралык финансылык уюмдардын бир катар жетекчилери катышууда.
Өз кезегинде Еврокомиссиянын төрагасы Урсула фон дер Лейен форумдун катышуучуларына видеоконференция аркылуу кайрылды.
Форум экономикалык кызматташтыктын экономикалык маселелери боюнча пикир алмашууга, жаңы мүмкүнчүлүктөрдү жана келечекти белгилөөгө мүмкүнчүлүк берет.
Аталган форумдун негизги темасы COVID-19дан кийин экономиканы кайра калыбына келтирүү, ошондой эле бизнес-чөйрөсүндөгү маселелер жана санариптештирүү болмокчу.
Буга чейин жашыл экономика темасына басым жасоо пландалып жатканы маалымдалган. Себеби, Европа өлкөлөрүндө экологиялык жактан натыйжалуу энергия ресурстарын пайдалануу жагынан эң алдыңкы жана инновациялык технологиялар бар.
Белгилей кетсек, форумдун алкагында өлкөгө европалык инвестицияны гана эмес, европалык инновациялык технологияларды да тартуу пландалууда.
Пикир
Оставить комментарий