Бишкек, 30.03.20. /Кабар/. Жакынкы күндөрү Кытайдан жүк ташуулар жандандырылат. Бул тууралуу өкмөт үйүндө өткөн брифингде биринчи вице-премьер-министр Кубатбек Боронов маалымдады.
Анын айтуусуна караганда, бир жумадан бери кеӊешмелер өткөрүлүп жатат.
"Калктын керектөө товарларын ташуу үчүн чек араны ачуу сунушталууда”, - деп кошумчалады Боронов.
Белгилей кетсек, өлкөдө коронавирусту жуктуруп алгандардын саны 94 кишиге жетти. Алардын ичинен Жалал-Абад облусунда – 49, Ош облусунда – 33, Чүй облусунда – 3, Баткен облусунда – 1, Бишкек шаарында – 7, Нарын облусунда – 1 учур. Коронавирус аныкталган бейтаптардын ичинен: аялдарда – 53 учур, эркектерде – 41 учур.
2020-жылдын 25-мартынан саат 08.00дөн баштап 15-апрелине саат 08.00гө чейин Бишкек, Ош, Жалал-Абад шаарында, Ноокат жана Кара-Суу, Сузак районунда өзгөчө абал киргизилген. Мындан улам саат 20:00-07:00 сааттар арасы коменданттык саат деп белгиленип, ал убакта көчөдө жүрүүгө тыюу салынды.
Ал эми саат 07:00дөн 20:00гө чейин жарандар сыртка үч себеп менен чыга алышат: дүкөндөн азык-түлүк, дарыканадан дары-дармек сатып алуу жана ооруканага баруу үчүн. Сыртка чыкканда жарандардын жанында өздүгүн тастыктоочу документи жана жол кагазы болуш керек.
Пикир
Оставить комментарий