Бишкек, 02.03.22. /Кабар/. Милдеттүү медициналык камсыздандыруу фонду жеңилдетилген электрондук рецепт боюнча дары-дармектерди сатуудан баш тартуу болбошу керектигин билдирди.
"Биз бардык фармацевтикалык компанияларды ММК фондунун аймактык башкармалыктары менен мурда түзүлгөн келишимдин бардык шарттарын сактоого чакырабыз", - деп айтылат уюмдун маалыматында.
ММК фондунун жетекчилиги аймактык башкармалыктарга келишимди аткаруу жана мамлекеттик кепилдиктер программасынын алкагында калкты жеңилдетилген рецепттер боюнча дары-дармек менен камсыздоо боюнча фармацевтикалык кампаниялар менен түшүндүрүү иштерин жүргүзүүнү тапшырды.
Эскерте кетсек, ММКФ менен кызматташкан дарыканалардын даректери ҮМБ/ҮДТ фойесинде илиниши керек. Дарыканалардын тизмесин http://foms.kg сайтынан да көрө аласыз.
"Жеңилдетилген рецепттерди тейлөөдөн баш тарткан учурда 113 ишеним телефонуна кайрылыңыз. Бардык уюлдук операторлордон чалуулар акысыз", — деп айтылат маалыматта.
Пикир
Оставить комментарий