• 84.79
  • 96.23
  • 1.13

Германияда Айтматовдун «Жамиля» повести боюнча немис тилинде музыкалык окуунун премьерасы болду

Маданият 0

Бишкек, 06.10.21. /Кабар/. 2021-жылдын 3-октябрында Моерс шаарында (Германия, Түндүк Рейн-Вестфалия Федералдык округу) белгилүү кыргыз жазуучусу Чыӊгыз Айтматовдун «Жамиля» повести боюнча немис тилинде музыкалык окуунун премьерасы болду. Бул музыкалык чыгарма германиялык режиссер Конрад Гёке тарабынан уюштурулду, - деп маалымдайт КРнын Тышкы иштер министрлигинин басма сөз кызматы.

Маалыматка ылайык, «Жамиля» повести боюнча музыкалык окуу кечесин уюштурууга европалык деӊгээлдеги музыканттар менен артисттер катышты: Детмольд музыкалык академиясынын жана Амстердам консерваториясынын окутуучусу, фортепиано жана аккордеон үчүн музыкалык коштоону түзгөн Марко Кассл, италиялык бас-баритон, Феррар консерваториясынын бүтүрүүчүсү, Даниярдын ролун ойногон Джулио Альвизе Казелли, сопрано, Нидерландыдагы ArtEZ консерваториясынын бүтүрүүчүсү Стелла Луиза Гёке – Жамилянын ролунда, германиялык актер жана аӊгемечи, Саиддин ролунда аӊгеме айткан Феликс Банхольцер жана Моерс шаарында жашап жаткан казакстандык пианист Гульназ Аймакова.

Музыкалык кеченин конокторуна Кыргызстандын Германиядагы элчиси Эрлан Абдылдаевдин каты окулуп берилди жана бул катта белгилүү кыргыз жазуучусу Айтматовдун чыгармаларынын дүйнөлүк маданияттагы өзгөчө орду жана мааниси белгиленди.

«Ч. Айтматовдун чыгармалары дүйнөнүн ар кайсы тилдерине, анын ичинде немис тилине которулган. Кыргыз элинин гана эмес, ошондой эле бүткүл адамзаттын мурасына айланган Айтматовдун чыгармаларына Германияда өзгөчө маани беришет», - деп айтылат маалыматта.

«Жамиля» повести боюнча коюлган музыкалык окуунун премьерасы көрүүчүлөрдүн купулуна толуп, массалык маалымат каражаттарында жана социалдык түйүндөрдө кеӊири жайылтылды. Бул музыкалык чыгарманы Германиянын башка шаарларында көргөзүү пландалып жатат.

Музыкалык кеченин сүрөттөрү фотограф Клаус Диекер тарабынан берилди.

Пикир

Оставить комментарий