Бишкек, 21-февраль /Кабар/. Азербайжандын Президенти Ильхам Алиев өлкөнүн биринчи айымы Мехрибан Алиеваны республиканын биринчи вице-президенти кылып дайындады. Бул тууралуу шейшембиде мамлекет башчысынын басма сөз кызматы билдирди.
Азербайжандын конституциясына ылайык, эгер мамлекет башчысы өзүнүн ыйгарым укуктарын аткарууга жөндөмсүз болсо, анда биринчи вице-президент мамлекет башчысынын ыйгарым укуктарын өзүнө алат.
“Азербайжандын Президенти Илхам Алиев шейшембиде өлкөнүн биринчи айымы Мехрибан Ариф гызын өлкөнүн биринчи вице-президенти кылып дайындоо тууралуу буйрукка кол койду”,-деп билдирген басма сөз кызматы.
Азербайжандын жарандары өткөн жылы 26-сентябрда конституцияга өзгөртүү киргизүү боюнча референдумга добуш беришкен. Башмыйзамга киргизилген толуктоолордо президенттин ыйгарым укуктуу мөөнөтүн 5 жылдан 7 жылга узартуу, вице-президент кызматын киргизүү, андан тышкары мамлекет башчысы кызматына жана депутаттыкка талапкерлер үчүн жаш-курактык чектөөнү алуу каралган. Референдум өттү деп таанылган, анткени ага шайлоочулардын 25%дан ашыгы катышкан. Еxit pollдун маалыматы боюнча, Азербайжандын конституциясына сунушталган бардык өзгөртүүлөрдү шайлоочулардын 88,5%ы колдогон.
Булак: Риа Новости
Пикир
Оставить комментарий