ИИМ: Кантта убактылуу кармоочу жайдан качкан жаран кармалды

Бишкек, 06.06.23./Кабар/. Кантта убактылуу кармоочу жайдан качкан Кушубек Сабыров кармалды. Бул тууралуу ИИМдин басма сөз кызматы билдирет.

Оор кылмыштарга шектелген 29 жаштагы Сабыров бүгүн Бишкек шаарынын аймагында жашынып жүргөн жеринен колго түшкөн.

Белгилей кетсек, Балыкчы шаарынын 29 жаштагы тургуну Кушубек Сабыров 5-июнда саат 01:40 чамасында Ысык-Ата райондук милициясынын убактылуу кармоочу жайынан качып кеткен.

Сабыров КР Кылмыш-жаза кодексинин 165-беренеси ("Адам уурдоо"), 207-беренеси ("Каракчылык"), 169-беренеси ("Эркиндигинен мыйзамсыз ажыратуу") жана 122-беренеси ("Адам өлтүрүү") менен айыпталып, кылмыш иши соттун карамагына 2023-жылдын 30-май күнү өткөн.

Ал ортодо Башкы прокуратура шектүүгө абактан качууга жардам көрсөткөн милиционерлер кармалгандыгын билдирген.