Бишкек, 2-май /Айжамал Дуйшоева - Кабар/. Кыргыз режиссеру Актан Арым Кубаттын “Кентавр” тасмасы 18-30-апрелде Тюрнхаут жана Брюг шаарларында өткөн Бельгиядагы «MOOOV» Эл аралык кинофестивалында баш байгени алды. Бул тууралуу КР кинематография фондунан билдиришти.
Фестивалдын арт-директору Марк Бунендин айтымында, «Приз КАНВАС» фестивалдын мыкты тасмасына ыйгарылат жана Бельгия, Нидерланд жана Люксембургда дистрибуция кепилденет. “Тасма Бенилюкс өлкөлөрүндө 2018-жылдын жазында көрсөтүлө баштайт”, - деп тактады М.Бунен.
MOOOV кинофестивалы дүйнө жүзү боюнча автордук кинолорду, бул дүйнөнүн байлыгын жана ар түрдүүлүгүн аныктаган тасмаларды тандайт. Негизделгенден тарта фестиваль бүтүндөй Бельгия үчүн маанилүү окуяга айланган.
Фестивалдын девизи – бул “Фландрия үчүн дүйнө жүзүнүн мыкты тасмалары”.
Негизги сынактык программада Сингапур, Түркия, Аргентина, Индия, Мексика, Түштүк Африка, Сенегал жана Кыргызстандан 8 тасма сунушталган.
Белгилей кетсек, Кыргызстанда тасма 31-марттан баштап көрсөтүлүүдө.
«Кентавр» - бул Кудайды издөө жана элинин каада-салтын сактоо үчүн айыгыша күрөшкөн адам тууралуу тасма. Бул ат адамдын канатына айланган адам менен аттын ортосундагы метафизикалык байланыш жөнүндө сага.
Пикир
Оставить комментарий