Бишкек, 21.01.19. /Кабар/. Кыргызстан менен Казакстан мунай жана мунай продуктыларын бажы төлөмсүз ташуу тууралуу сүйлөшүүлөрдү баштады. Бул тууралуу "Кабар" агенттигине Өнөр-жай, энергетика жана жер казыналарын пайдалануу мамлекеттик комитетинен билдиришти.
Бүгүн Кыргызстан менен Казакстандын өкмөттөрүнүн мунай жана мунай заттарын ташуу багытында соода-экономикалык кызматташуу жөнүндө макулдашуунун долбоорун талкуулоонун биринчи этабы жүрүүдө.
Талкууланып жаткан долбоорго ылайык казакстандык тарап бекитилген индикативдик баланс жана протоколго ылайык Кыргызстанга бажы төлөмсүз мунай заттарын экспорттоого милдеттенет.
Индикативдик баланс 5-6 күн аралыгында Казакстанда боло турган сүйлөшүүнүн экинчи этабында бекитилет.
Долбоордун аткарылышын көзөмөлдөө милдети Кыргызстан тараптан Өнөр-жай, энергетика мамлекеттик комитетине, Казакстан тараптан Энергетика министрлигине жүктөлгөн. Кыргызстан тараптан жумушчу топтун курамында аталган комитеттин төрагасынын орун басары Жыргалбек Сагынбаев иш алып барат.
Пикир
Оставить комментарий