Өлкө ичине кирген 6 жүк ташуучудан коронавирус табылды - Үсөнбаев

COVID - 19 0

Бишкек, 21.05.20. /Кабар/. Өлкө ичине кирген 6 жүк ташуучудан коронавирус табылды. Бул тууралуу өкмөт үйүндөгү маалымат жыйында саламаттык сактоо министринин орун басары, өлкөнүн башкы санитардык дарыгери Нурболот Үсөнбаев билдирди.

Анын айтымында, бүгүн, 21-майда саат 10:00гө карата республика боюнча коронавирус жуктурган жаңы 43 учур катталды.

"Алардын ичинен 6 жаран жүк тушуучу унаанын айдоочусу болгон. Айдоочулар чет жактан өлкө аймагына киргенде алгоритмге ылайык, алардан ПЧР тесттери алынган. Тесттин жыйынтыгында 6 айдоочуда коронавирус табылган", - дейт министрдин орун басары.

Үсөнбаев кошумчалагандай, жаңы катталган 43 учурдун 12си Россиядан келген кыргызстандыктардан аныкталды. Алардын катарында "Жүк-200" менен келгендерде да илдет катталган.

Белгилей кетсек, Кыргызстанда коронавирус жуктурган учурлардын саны 1313кө жетти. Алардын ичинен 270и медицина кызматкери. Илдеттен 929 жаран айыкса, коронавирус жуктурган 14 адам каза болду.

Пикир

Оставить комментарий