Бишкек, 26.09.17. /Мехриниса Сулайманова – Кабар/. КРдин Мамлекеттик катоо кызматынан (МКК) Ош облусунун Шейит-Тоо айылындагы биометрикалык маалыматтардын чогултулушу боюнча жагдайга түшүндүрмө беришти.
“Кабар” агенттигине МКК басма сөз кызматынан кабарлашкандай, биометрикалык маалыматтарды чогултуу өлкөнүн 7 облусунда жана 40 райондо жүргүзүлүп жатат.
“Жерине барып алган мобилдүү топ бар. Башкача айтканда алар ар дайым кыймылда. Шейит-Тоо айылында жабдыктарды койо турган бир эле имарат бар. Ошол эле имаратта талапкердин штабы жайгашкан. Мобилдүү топ ошол жакка барып, биометрикалык маалыматтарды чогултуп, андан ары кетишкен”,-деп кабарлашты басма сөз кызматынан.
Ведомствадан билдиришкендей, Шейит-Тоо айылында кары-картаңдар көп, алар мобилдүү топту айылга келүүсүн өтүнүшкөн.
Эске сала кетсек, массалык маалымат каражаттарында (ММК) МКК президенттикке талапкер Сооронбай Жээнбековдун штабында биометрикалык маалыматтарды чогултуп жатат деген маалымат тараган.
Пикир
Оставить комментарий