Бишкек, 30.11.21. /Кабар/. Кайсыл бир өлкөдө оmicron штаммынын очогу болгон учурда гана кирүүгө тыюу салынат. Бул тууралуу КР Саламаттык сактоо министрлигинин басма сөз кызматы билдирет.
Ведомствонун маалыматына ылайык, министрлик коронавирустун жаңы оmicron штаммы боюнча эпидемиологиялык кырдаалга көзөмөл жүргүзүп турат, зарыл болгон шартта жарандарына Кыргызстанга кирүүгө убактылуу тыюу салынган өлкөлөрдүн тизмеси аныкталат.
Белгилей кетсек, КРминистрлер кабинети өлкө аймагында коронавирус инфекциясынын жаңы штаммынын жайылышына жол бербөөгө багытталган чаралар 2021-жылдын 1-декабрынан тарта ишке ашырылаарын билдирди.
Чет элдик жарандар жана кыргызстандыктар Кыргыз Республикасына кирүү үчүн эмделүү макамынан көзкарандысыз түрдө, милдеттүү тартипте коронавирус инфекциясына карай ПЧР-тест тапшырып, терс ПЧР-тестке ээ болушу керек.
Жаңы штамм жөнүндө маалыматтардын негизинде, КР Саламаттык сактоо министрлиги «omicron» жаңы штаммынын очогу аныкталып жаткан өлкөлөрдөгү эпидемиологиялык абалга көз салып, анын өлкөгө кирүүсүнө жана жайылышына жол бербөө боюнча чараларды кабыл алуу максатында ал өлкөлөрдүн тизимин КР Улуттук коопсуздук мамлекеттик комитетинин Чек ара кызматына берет. Мындай өлкөлөрдүн жарандары Кыргыз Республикасынын аймагына кирүүсүнө тыюу салынат.
Министрлик жана ведомстволорго республикада COVID-19дун жаңы штаммына байланыштуу эпидемиологиялык абал курчуп кеткен учурда толук даярдыкта туруусу тапшырылды.
Эске салсак, буга чейин Саламаттыкты сактоо министрлиги, Тышкы иштер министрлиги, ошондой эле Дүйнөлүк саламаттыкты сактоо уюму менен COVID-19дун жаңы штаммы маселеси боюнча чукул консультация өткөрүлгөн.
Пикир
Оставить комментарий