Бишкек, 29.08.19. /Кабар/. Президент Сооронбай Жээнбеков кол койгон Жарлыкка ылайык, саламаттык сактоону, калкты медициналык тейлөөнү жана Кыргыз Республикасынын медицина чөйрөсүндөгү кадрдык потенциалды өнүктүрүүгө кошкон олуттуу салымы, ошондой эле өлкөнүн региондорун социалдык-экономикалык өнүктүрүүгө катышкандыгы үчүн саламаттык сактоо тармагынын чет өлкөлүк бир катар кызматкерлери Кыргыз Республикасынын мамлекеттик сыйлыктары менен сыйланды. Бул тууралуу президенттин аппаратынын маалыматтык саясат бөлүмү билдирди.
«Достук» ордени менен:
Джошибаев Сейтхан — кардиохирург, Казакстан Республикасынын Тараз шаарынын «Кардиохирургия жана трансплантология илимий-клиникалык борбору» жоопкерчилиги чектелген шериктигинин директору;
«Даңк» медалы менен:
Ван Чжэнь — профессор, Кытай Эл Республикасынын Хэбэй провинциясынын Хэбэй медициналык университетинин Биринчи госпиталынын кардиотерапия кафедрасынын жана бөлүмүнүн башчысы;
Ким Алексей Иванович — кардиохирург, Россия Федерациясынын Саламаттык сактоо министрлигинин «А. Н. Бакулев атындагы Жүрөк-кан тамыр хирургиясы улуттук медициналык изилдөө борбору» федералдык мамлекеттик бюджеттик мекемесинин туубаса жүрөк кемтиги менен туулган ымыркайларды жана бир жаштагы балдарды реконструктивдөө хирургиясы бөлүмүнүн башчысы.
Кыргыз Республикасынын Ардак грамотасы менен:
Михайлова Елена Владимировна — «Газпром» ачык акционердик коомунун 105-департаментинин начальниги;
Приймак Владимир Викторович — «Газпром» ачык акционердик коомунун Социалдык демилгелерди колдоо фондунун башкы директору.
Пикир
Оставить комментарий