Штаб: Дары-дармек жана кычкылтек концентраторлорун сатып алуу иштери уланууда

Өкмөт 0

Бишкек 15.07.20. /Кабар/. Өкмөт тарабынан дары-дармектерди жана кычкылтек концентраторлорун сатып алуу иштери уланууда. Бул тууралуу Кыргыз Республикасынын премьер-министри Кубатбек Боронов Республикалык ыкчам штабдын жыйынында айтты, - деп билдирет өкмөттүн аппаратынын маалыматтык камсыздоо бөлүмү.

Белгиленгендей, республикага дары-дармектерди жана медициналык жабдууларды ташуу боюнча бир катар өлкөлөр менен келишимдерди түзүү маселелери иштелип жатат.

«Өлкөгө жакында 200 кычкылтек концентраторунан турган партия келди. Дагы 500-1000 даана концентратор сатып алынат. Жакынкы мезгилде гуманитардык жардам катарында 400 концентратор келет. Концентраторлор жана дары-дармектер аймактар ортосунда бөлүштүрүлөт. Алар мүмкүн болушунча айылдардагы фельдшердик-акушердик пункттарга жеткирилет. Тармактык мамлекеттик органдар мамлекеттик ташуулар багытында дары-дармектер жана жабдуулар менен камсыздоо, ошондой эле шаарлардын жана облустардын дарыканаларды камсыз кылуу үчүн фармацевтикалык компанияларга шарттарды түзүү боюнча иштерди күчөтүүсү зарыл. Өлкөнүн бардык аймактары тиешелүү дары-дармектер менен камсыздалат», - деди өкмөт башчы.

Мындан тышкары Кубатбек Боронов дарылардын жана медициналык тейлөө кызматтарынын баасына мониторинг жана көзөмөл жүргүзүү иштерин улантуунун маанилүүлүгүн белгиледи.

Премьер-министр шаардагы жаңы түнкү станционарларды түнкүсүн оор абалдагы бейтаптар кайрыларын эске алуу менен жогорку квалификациялуу адистер менен камсыздоо зарылдыгына өзгөчө көңүл бурдурду.

Саламаттык сактоо министрлигине медицина кызматкерлерин жеке коргонуу каражаттары менен камсыздоону көзөмөлдөөнү күчөтүү тапшырылды. Тармактык органдарга ооруканаларга өткөрүү режимин иретке келтирүү, инфекциянын жайылышына жол бербөө максатында карантиндик режимде так сактоо милдеттендирилди.

Пикир

Оставить комментарий