• 84.68
  • 103.38
  • 1.15

Согуштун ардагери Дүйшөбай уулу Сатыбектин ийгиликтери тууралуу балдарынын эскерүүсүндө

Жеңишке 75 0

Бишкек, 07.05.20. /Кабар/. Улуу Жеңиштин 75 жылдык мааракесин утурлай Улуу Ата Мекендик согуштун ардагери, көп жыл бою мугалимдик кесипти аркалаган Дүйшөбай уулу Сатыбектин ийгиликтери тууралуу балдары эскеришет.

Анда Кыргыз Республикасынын Ички иштер министрлигинде кызмат өтөп жаткан уулунун эскерүүсүнөн сунуштайбыз.

«Атам Дүйшөбай уулу Сатыбек 1940-жылы Таш-Көмүр шаарындагы орто мектепти аяктап, Ак-Суудагы айылдык мектепте мугалим болуп эмгек жолун баштаган. Ошол эле жылы Советтик Армиянын катарына чакырылып, алты жыл бою аскерде кызмат өтөдү. Анын бала чагы да, күрдөөлдүү эмгектин жүгүн көтөргөн күч убагы да, замандын каардуу жылдарына дуушар болуп, кан майданында такшалгандардын бири эле. Пятигорск шаарында 9-чу мотострельковый дивизиясынын 142 аткычтар полкундагы жооркерлердин катарына кошулган. 1943-жылдын башында Махачкала шаарындагы аскер окуу жайынын кыскартылган курсун аяктап, кенже лейтенант наамына ээ болуп, офицерлердин катарын толуктаган.

Түштүк Украина фронтунун курамындагы аскер бөлүгүндө взводдун, ротанын командири, батальондун, батареянын командиринин орун басары милдеттерин аткарып, Оржоникидзе шаарынан салгылашууну баштап, Ростов-на Донуга келгенде жарадар болуп, Тбилисинин госпиталында дарыланган. Ал бутунан оор жарадар болуп, 1944-жылы Уфа шаарында узак мөөнөт госпиталда жаткан. Согуштун оргуштаган жалыны өчпөй, батышка багыт алып бара жаткан кезде атабыз Сатыбек Орто Азия аскер округуна жөнөтүлгөн. Ал Ташкенттеги аскер кызматкерлерин даярдоочу курсту бүтүргөн. Андан соң, Сузак райондук аскер комиссариатында бөлүм башчы болуп 1945-жылдын август айына чейин иштеген.

Экинчи ирет өз ыктыяры менен согушка аттанып, жапондорду тез арада жылас кылгандардын катарында болгон. Ошентип, ак булуттай табияттуу атабыз кылган кызматына жараша коомчулуктун сыйына татып, 1946-жылы августа аскерден келген. Атабыздын күжүрмөн эмгегин совет өкмөтү бийик баалап, 1944-жылы “Кызыл Жылдыз”, кийин биринчи, экинчи жана үчүнчү даражадагы Ата Мекендик согуш ордендери менен сыйлаган. Бул аскердеги эрдигин даңктаган атабыздын сыйлыктары биз үчүн чоң сыймык. Андан сырткары, турмуштун тууруна ынанып, атабыз саясат, чарбачылык, эл агартуу жааттарында дагы узүрлүү эмгек өтөдү. Бир топ жылдар бою колхоздун башкармасы, Жаңы-Жол райондук партия комитетинин инструктору болуп эмгектенди.

Андан кийин Аксыдагы эң тунгуч, 1924-жылы Арстаналы Осмонбеков уюштурган мектепте ардактуу эс алууга чыкканга чейин мугалимдик кесипти аркалады.

Көп жылдык асыл эмгеги үчүн Сатыбек агайга 1985-жылы СССРдин эл агартуусунун отличниги төш белгиси ыйгарылды. Ошондой эле ондогон медалдар менен сыйланган кадыр-барктуу, нарк нускалуу, калкына мээри төгүлгөн карыялардын катарын толуктап өмүр өтөдү.

Бүбүайым апа, Сатыбек ата дагы эл агартуунун кызматкери болгон. Булар үлгүлүү үй-бүлө болушуп, жашоодо шам чырактай нур чачып, айылдын көркү, асыл ойдун кенчи болуп өмүр сүрүштү. Алар 8 уул-кыздарды тарбиялап, эрезеге жеткизип элине кошту. Урпактары дарыгерлер, инженерлер, жогорку окуу жайынын, укук коргоо органдарынын кызматкерлери болуп кыргыз элине ак дилинен кызмат өтөөдө», - деп КР ИИМдин Экстремизм жана мыйзамсыз миграцияга каршы аракеттенүү боюнча кызматында көп жылдардан бери үзүрлүү эмгектенип келе жаткан уулу эскерди.

Пикир

Оставить комментарий