Бишкек, 03.09.20. /Кабар/. Талас облусунда эпидемиологиялык абал туруктуу. Бул тууралуу онлайн брифинг учурунда өкмөттүн Талас облусундагы өкүлү Марат Мураталиев билдирди.
Анын айтымында, учурда облустун ооруканаларында коронавирус жуктурган 27 бейтап дарыланууда: алардын ичинен 23ү пневмония менен ооругандар, төртөө коронавирус жуктурган жарандар.
"Облус тургундарын санитардык эрежелерди сактоого чакырабыз", - деди ал.
Саламаттык сактоо министрлигинин Талас облусундагы координатору Айжамал Шамбетова билдиргендей, пандемия башталгандан бери Таласта коронавирус жуктурган 1 миң 375 учур каталган: 193 учуру - лабораториялык жол менен тастыкталган коронавирус, 1 миң 182си - клиникалык эпидемиологиялык жол менен тастыкталган учурлар (пневмония).
"Учурда 5 бейтап үй шартында дарыланып жатат", - деди ал.
Облус башчысынын айтымында, коронавирус жуктурган бейтаптардын ичинен 1 миң 173 киши оорудан айыгып чыккан, 65 киши каза болгон.
Пикир
Оставить комментарий