Өзбекстанда ишкерлерге 1 млн долларга чейин насыя берилет

Бишкек, 29.10.21. /Кабар/. Өзбекстанда ишкерлер мындан ары 1 миллион долларга чейин насыя ала алышат.

Өзбекстан президенти 27-октябрда кол койгон токтомго ылайык, насыя улуттук валюта менен берилет. Насыянын Борбордук банктын базалык ставкасынан (14%) ашкан бөлүгүнүн үстөк пайыз чыгымдары ишкерлерге кайра кайтарылат. Компенсацияны Ишкерликти колдоо фонду төлөп берет.

Документте 1-ноябрдан баштап Өзбекстандын атынан ишкерликти колдоо долбоорлору үчүн эл аралык каржы институттарынан жана чет өлкөлүк өкмөттүк уюмдардан алынган насыялар долбоорго катышкан каржы уюмдары тарабынан 10 жылдан кем эмес мөөнөткө кайра каржыланары да белгиленген.