Бишкек, 22.12.20. /Кабар/. Жалал-Абад облусунда мергенчилердин куралдары текшерилүүдө. Бул тууралуу облустук ички иштер башкармалыгынан билдиришти.
Маалыматка ылайык, 2021-жылдын 10-январында өтүүчү президенттик шайлоого даярдык көрүү жана өткөрүү багытында Жалал-Абад облустук милициясы тарабынан профилактикалык иштер жүргүзүлүүдө.
Сузак райондук жана Майлуу-Суу шаардык ички иштер бөлүмдөрү тарабынан мергенчиликти сүйүүчүлөр жана куралы бар каттоодо турган атуулдар текшерүүгө алынууда. Милиция кызматкерлери курал-жарактардын сакталуу жайларына, алардын тиешелүү документ иштерине көзөмөл кылып жатышат.
Ошондой эле эл арасында мыйзамсыз сакталган курал-жарактарды өз ыктыяры менен тапшыруу боюнча түшүндүрүү иштери жүргүзүлүүдө.
Ал эми Чаткал райондук милициясы тарабынан шайлоого байланыштуу добуш берүү тилкелериндеги коопсуздук эрежелери текшерилди. Район аймагындагы Ак-Таш, Курулуш, Жаңы-Базар жана Айгыржал участкаларынын коопсуздугу көзөмөлгө алынып, шайлоо участогундагы кызматкерлер менен маектешүүлөр орун алды.
Добуш берүү учурундагы тынчтыкты сактоо жана ар кандай чагымчыл чакырыктардын алдын алуу маселеси талкууланды.
Пикир
Оставить комментарий