Акылбек Жапаров ар кыл конфессиялардын өкүлдөрү менен көчөт отургузууга катышты

Бишкек, 29.03.22. /Кабар/. Министрлер кабинетинин төрагасы Акылбек Жапаров «Жашыл мурас» улуттук кампаниясын жана «2021-2026-жылдарга Кыргызстандын диний чөйрөдөгү мамлекеттик саясатынын концепциясын» ишке ашыруу алкагында Кыргызстандагы ар кыл конфессиялардын өкүлдөрү менен көчөт отургузууга катышты. Бул тууралуу министрлер кабинетинин басма сөз кызматынан кабарлашты.

«Көчөттөрдү отургузуу – бул борбор шаарыбызды жашылдандыруу жана өлкөдөгү ар түрдүү конфессиялардын жана жарандардын биримдигин чыңдоо гана эмес, ошондой эле жаратмандык процесс. Дүйнөдө тынымсыз өзгөрүүлөр болуп жаткан учурда бизге биримдик жана ынтымак болуп көрбөгөндөй зарыл», - деп белгиледи министрлер кабинетинин төрагасы.

Кыргызстандын Дин иштери боюнча мамлекеттик комитетинин директору Тойгонбай Абдыкаров белгилегендей, бул иш-чаралар 2018-жылы түзүлгөн Конфессиялар аралык кеңештин алкагында өткөрүлүүдө.

«Кеңеш 17 диний уюмдун өкүлдөрүн бириктирет жана анын негизги максаты - конфессиялар аралык диалогду, ар кандай көз караштарды жана ишенимдерди сыйлоо принциптерин, сабырдуулукту жана диний сабырдуулукту бекемдөө, ошондой эле радикалдашуунун алдын алуу.

Иш-чаранын жүрүшүндө катышуучулар Бишкек шаарындагы «Ынтымак» сейил багына көчөт отургузуп, анын аймагын тазалашты.

Иш-чарага Кыргыз Республикасынын Дин иштери боюнча мамлекеттик комитетинин кызматкерлери, диний жана бейөкмөт уюмдардын, диний окуу жайлардын өкүлдөрү катышты.