• 87.96
  • 95.21
  • 0.97

Акылбек Жапаров Силикон өрөөнүндө HP жана NVidia компанияларынын өкүлдөрү менен жолугушту

Өкмөт 0

Бишкек, 20.04.24. /Кабар/. Министрлер кабинетинин төрагасы Акылбек Жапаров Сан-АКШнын Франциско шаарына болгон жумушчу сапарынын алкагында бир катар технологиялык корпорациялардын өкүлдөрү менен жолугушууларды өткөрдү.

Министрлер кабинетинин башчысы графикалык процессорлор, жасалма интеллект системалары жана эсептөө технологиялары тармагында адистешкен Nvidia корпорациясынын башкы кеңсесинде болду.

Компаниянын эсептөө системалары жана графикалык карталар боюнча вице-президенти Йогеш Агравал жасалма интеллект тармагындагы учурдагы тенденциялар жана перспективалар, ошондой эле түрдүү өлкөлөр менен кызматташуу форматтары тууралуу айтып берип, Кыргызстан менен кызматташууга даяр экендигин билдирди.

Акылбек Жапаров Nvidia суперкомпьютеринин жардамы менен бир жыл ичинде кыргыз тилинин тил модели кандайча иштелип чыкканын айтып берди.

«Биздин жасалма интеллект өкмөттүк радио каналдар аркылуу жаңылыктарды берип жатат. Бул чоң жарыштын кичинекей кадамы экенин түшүнөбүз. Бул биз үчүн маанилүү учур, анткени ал биздин технологиялык прогрессти гана көрсөтпөстөн, өзүбүздүн технологиялык көз карандысыздыкка умтулганыбызды да баса белгилейт. Айтмакчы, бул тууралуу сиздин лидериңиз Йенсен Хуан Дубайда өткөн Дүйнөлүк өкмөт саммитинде технологиялык көз карандысыздык, өзгөчө эгемендүү жасалма интеллект мамлекеттин эгемендүүлүгүн аныктоочу өзгөчөлүгү болот деп айтты», - деген ал, быйылкы жылы ишкананын жабдууларын өкмөт сатып алууну пландап жатканын кошумчалады.

Корпорациянын вице-президентти өз кезегинде кыргыз тилиндеги жасалма интеллектти өнүктүрүү боюнча демилгелерди кубаттап, бул багытта мындан аркы ийгиликтерди жана Кыргызстанда IT тармагын өнүктүрүүнү каалады.

Тараптар мындан ары да жемиштүү кызматташтыкты өнүктүрүүгө жана IT тармагындагы демилгелерди колдоого даяр экендиктерин билдиришти.

Кыргызстандын делегациясы ошондой эле Nvidia компаниясынын алдыңкы иштеп чыгуулары көрсөтүлгөн компаниянын көргөзмө залында болушту.

Министрлер кабинетинин төрагасы америкалык Hewlett-Packard Company корпорациясынын маалыматтык технологиялар тармагына адистешкен Персоналдык системалар бөлүмүнүн президенти Алекс Чо менен жолугушту.

Акылбек Жапаров компанияга өзгөчө салык шарттарын камсыз кылуу мүмкүнчүлүгү менен Кыргызстанда өзүнүн өкүлчүлүгүн ачууга чакырды.

Өз кезегинде, HP өкүлү Алекс Чо жемиштүү кызматташууну жана өз ара аракеттенүүнү өнүктүрүүгө даяр экендигин билдирди.

Жумушчу сапарынын алкагында министрлер кабинетинин башчысы венчурдук инвестор жана ишкер Тим Дрейпер менен жолугушту, ал Hotmail, Skype, Tesla, SpaceX, Coinbase сыяктуу көптөгөн ийгиликтүү стартаптарга инвестиция салган.

Тим Дрэйпер Борбор Азия өлкөлөрү стартап-индустрияны активдүү өнүктүрүп жатканын айтып, бул тармакты колдоого даяр экенин билдирди. Учурда Тим Дрейпер университети Жогорку технологиялар паркы менен кызматташып жатат жана бул кызматташтыктын алкагында келишимге кол коюлган.

Сүйлөшүүнүн жүрүшүндө Кыргызстанда IT тармагын өнүктүрүү маселелери, Кыргызстанда да, Борбордук Азияда да венчурдук инвестицияларды өнүктүрүүнүн келечеги жана демилгелери талкууланды.

Пикир

Оставить комментарий