Бишкек, 26.10.22. /Кабар/. Казакстандын Астана шаарында Кыргызстандын маданият күндөрүнүн алкагында 26-29-октябрь күндөрү Кыргызстандын кино күндөрү өтөт. Бул тууралуу Маданият, маалымат, спорт жана жаштар саясаты министрлигинин басма сөз кызматынан билдирди.
Маалыматка ылайык, 26-октябрда кыргыз кино күндөрүнүн расмий ачылышы болуп, Кыргыз эл артисти, кинорежиссёр Артык Сүйүндүковдун "Шамбала" көркөм тасмасы көрсөтүлөт.
27-октябрда кинорежиссёр Айбек Дайырбековдун “Дарак ыры" музыкалуу тасмасы, 28-октябрда режиссёр Эмил Атагелдиевдин "Көл", ал эми 29-октябрда кинорежиссёр Бакыт Мукул жана Дастан Жапар уулунун "Акыркы көч" тасмалары көрсөтүлөт.
Кино күндөрү Астана шаарындагы "Керуен" оюн-зоок-соода комплексинини кино залында өтөт.
Аталган тасмалар ийгиликтүү тартылып, акыркы жылдары эл аралык ири фестивалдарда байгелерге ээ болуп келүүдө.
Белгилей кетсек, ушул жылы 26-29-октябрь аралыгында Казакстанда Кыргызстандын маданият күндөрү өтөт.
Пикир
Оставить комментарий