Бишкек, 12.06.19. /Кабар/. Душанбеде өтө турган Азия лидерлеринин саммитине байланыштуу 14-15-июнь күндөрү шаардын негизги көчөлөрү, соода борборлору жана базарлары жабык болот.
Борбордогу «Садбарг» соода комплексинде иштеген Далер аттуу сатуучу ага бул күндөрү жумушка чыкпоо тууралуу билдирүү келгенин айтты. «Бизге Душанбеге бир нече өлкөнүн президенттери келе турганын, мындан улам соода жайлары жабык болорун эскертишти», — деди ал.
Мындан тышкары учурда сынактар өтүп жаткан шаардагы бардык окуу жайлар эки күнгө жабылат. Укук коргоо органдары аймактын жашоочуларына саммит өткөн күндөрү Душанбеге келбей турууну сунушташты. Шаардык ички иштер башкармалыгы Душанбенин негизги көчөлөрү жана Душанбе-Хожент автоунаа жолунун Варзоб капчыгайындагы бөлүгү жабык болорун билдирип, жарандарга коомдук транспортто жүрүү кеңешин берди.
Азиядагы өз ара карым-катнаш жана ишеним чаралары боюнча кеңешменин мамлекет башчыларынын бешинчи саммитине Орусиянын, Кытайдын, Ирандын, Азербайжандын, Өзбекстандын, Казакстандын, Кыргызстандын, Түркмөнстандын, Бангладештин жана Шри-Ланканын президенттери, ошондой эле Ооганстандын өкмөт башчысы Абдулла Абдулла катышат. Мындан тышкары дагы 15 өлкөнүн премьер-министрлери, вице-премьерлери жана тышкы иштер министрлери келет деп күтүлүүдө.
Тажик парламентинин депутаты Абдухалим Гаффоровдун айтымында, саммитте Азия өлкөлөрүнүн лидерлери чөлкөмдөгү маселелерди талкуулашат.
Азиядагы өз ара карым-катнаш жана ишеним чаралары боюнча кеңешменин мамлекет башчыларынын бешинчи саммити Душанбеде 14-15-июнь күндөрү өтөт. Бул эл аралык форум Азиядагы тынчтыкты, коопсуздукту жана туруктуулукту камсыз кылуу максатында түзүлгөн. Ага Азиянын жалпы аянтынын 90 пайызга жакынын ээлеген 27 өлкө кирет. Мындан тышкары анда дагы сегиз мамлекет менен беш эл аралык уюм, анын ичинде Бириккен Улуттар Уюму байкоочу макамына ээ.
Пикир
Оставить комментарий