Бишкек, 20.04.23. /Кабар/. Кыргызстандын Россиядагы элчилигинин колдоосу менен Москва шаарындагы В.В.Жириновский атындагы Дүйнөлүк цивилизациялар университетинде "Көчмөндөр цивилизациясы" музейинин салтанаттуу ачылышы өттү.
Элчиликтен билдиришкендей, музей ушул жылы 6-мартта Москва шаарында өткөн Кыргыз-Россия аялдарынын биринчи форумунун алкагында кол коюлган меморандумга ылайык уюштурулду.
"Анын максаты кыргыз элинин искусствосун жана каада-салтын, көчмөн маданиятын жайылтуу, маданий-агартуу иш-чаралары аркылуу мекендештерге жана башка элдердин кызыккан өкүлдөрүнө таанытуу болуп саналат", - деп айтылат маалыматта.
"Көчмөндөр цивилизациясы" музейинин башкы экспонаты – ичи толук жасалгаланган кыргыз боз үйү. Музейдин жетекчиси "Боз үй дайым биз менен" долбоорунун автору – кыргыз диаспорасынын активисти Дамира Казакпаева.
"Көчмөндөр цивилизациясы" музейинде маданияттар аралык байланыштарды өнүктүрүүгө көмөктөшүүчү экскурсиялар, "чий курчак" улуттук куурчактарын жасоо боюнча мастер-класстар, тематикалык көргөзмөлөр жана башка билим берүү жана маданий иш-чаралар өткөрүлөт.
Пикир
Оставить комментарий