Баткен облусунун көйгөйлөрү жана муктаждыктары мамлекеттин көңүл чордонунда - Базарбаев

Бишкек, 21.01.23. /Кабар/. Баткен облусунун көйгөйлөрү жана муктаждыктары мамлекеттин көңүл чордонунда. Бул тууралуу эмгек, социалдык камсыздоо жана миграция министри Кудайберген Базарбаев Кара-Бак айылында өрүк майын өндүрүү боюнча цехтин ачылыш аземи учурунда билдирди.

Ведомстводон билдиргендей, иш-чарага министр менен бирге Япониянын Кыргызстандагы элчиси Гидеки Года, БУУ ДАПтын өлкөлүк директору Кожиро Накай , БУУ КЖКБнын Борбордук Азиядагы өкүлү Ганс Шоддер, өзгөчө кырдаалдар министринин орун басары Азамат Мамбетов, президенттин Баткен облусундагы өкүлүнүн орун басары Жаныбек Исаков катышты.

Бул долбоор БУУнун Бүткүл дүйнөлүк азык-түлүк программасы боюнча Япония өкмөтү тарабынан Баткен облусуна жардам көрсөтүүнүн алкагында ишке ашырылган.

Ошондой эле Япония өкмөтүнүн финансылык колдоосу менен БУУ ДАП линиясы боюнча "эмгекке азык-түлүк" долбоорунун алкагында Баткен облусу боюнча коомдук иштерге 25 миң 642 жаран тартылган, алар иштин жыйынтыгы боюнча 100 кг ун жана 10 литр май (496 тонна азык-түлүк) алышкан.

Министр салтанаттын катышуучуларынын алдында 2022-жылдагы чек ара жаңжалынан улам жабыркаган Баткен облусунун үй-бүлөлөрүнө мамлекет тарабынан көрсөтүлүп жаткан жардамды баса белгиледи.

"Президент Садыр Жапаровдун "Баткен облусундагы куралдуу кагылышуунун натыйжасында жабыркаган айрым калктуу конуштарын калыбына келтирүү боюнча кошумча чаралар жөнүндө" жарлыгынын алкагында министрлик муктаж жарандарга жардам көрсөтүү боюнча системалуу жана ырааттуу иштерди жүргүзүүдө.

Ошентип, министрлик 2022-жылдын сентябрында болгон чек ара жаңжалынын кесепетинен жапа чеккендердин жана курман болгондордун үй-бүлөлөрүнө бир жолку материалдык жардам төлөп берди.

Анын алкагында каза болгондордун үй-бүлөлөрү 1 млн сомдон, 200 миң сомдон оор жаракат алышкан жана 100 миң сомдон 2022-жылдын декабрь айынын аягына чейин алышкан. Бир жолку материалдык жардам 62 жаранга (50 адам жабыр тарткан, 12 адам курман болгон) төлөнүп берилди. Бул максатта министрлик 17,8 млн сом төлөгөн", - деди министр.

Министр ошондой эле министрлик 2022-жылдын жыйынтыгы боюнча Баткен облусунун социалдык муктаждыктарына 1 млрд 700 млн сом, ошондой эле "социалдык контракт" долбоорунун алкагында "Үй бүлөгө көмөк" жөлөкпулун алган жакыр үй-бүлөлөргө 25 млн сом бөлүнгөнүн белгиледи.