Бишкек, 14.10.22. /Кабар/. Базар-Коргондо токой чарбасында 100дөн ашуун дарак мыйзамсыз кыйылган. Бул тууралуу Жаратылыш ресурстары министрлигинин басма сөз кызматы билдирет.
Маалыматка ылайык, Жалал-Абад облусунун Базар-Коргон районундагы “Ачи” токой чарбасынын аймагындагы рейддик иш-чаралардын жүрүшүндө бак-дарактарды массалык түрдө кыюу фактылары аныкталган. Токой чарбасынын администрациясы тарабынан бак-дарак аянттарын массалык түрдө жок кылуусуна жол берилип, шалаакылыктын кесепетинен ар кандай диаметрдеги 112 дарак мыйзамсыз кыйылган.
Ошондой эле тиешелүү уруксат документтери жок кыйылган жети дарак менен "ГАЗ-53" үлгүсүндөгү унаа кармалган.
Текшерүүнүн жыйынтыгында бардык фактылар боюнча жеринде актылар түзүлүп, унаа сактоо үчүн токой чарбасына өткөрүп берилди.
Топтолгон материалдар кошумча иликтөө үчүн укук коргоо жана көзөмөл органдарына жөнөтүлдү.
Пикир
Оставить комментарий