Бишкек, 17.05.22./Кабар/. Билим берүү жана илим министри Алмазбек Бейшеналиев иш сапары менен Ысык-Көл облусундагы окуу жайларды кыдырууда. Бул тууралуу ведомствонун маалымат кызматы билдирет.
Бүгүнкү сапары Ысык-Көл мамлекеттик университетинен башталды. Анда министр мекеменин окутуучу курамы, окутуунун жүрүшү, материалдык-техникалык базасы жана илимий лабораториялар менен таанышты.
Кыдыруу учурунда Алмазбек Бейшеналиев жогорку окуу жайдын ректоруна стартап борборлорду түзүүнү тапшырды.
К.Тыныстанов атындагы Ысык-Көл мамлекеттик университети – аймактагы алдыӊкы жогорку окуу жайы. 1940-жылдан бери студенттерге билим берип келген университеттин курамына 8 факультет кирет. Сабактар 7 окуу корпусунда жүргүзүлүп, аларда 142 окуу аудиториясы, 49 окуу-методикалык кабинет, 14 лекциялык зал, 20 компьютердик жана 6 мультимедиялык класстар бар.
Университеттин илимий китепканасы аймактагы эле эмес, республикабыздагы эӊ бай китепкана болуп эсептелет. Бул жогорку окуу жайдын диплому КМШ өлкөлөрүндө жана алыскы чет өлкөлөрдө таанылган.
Пикир
Оставить комментарий