Бир жарым жылдын ичинде дээрлик 13 миң аз камсыз болгон үй-бүлө өз ишкерлигин ачты

Бишкек, 06.01.24. /Кабар/. Бир жарым жылдын ичинде “Социалдык контракт” программасына катышуу үчүн 14 миң 985 арыз берилген, анын ичинен 12 миң 800 жакыр жана аз камсыз болгон үй-бүлө өз ишмердүүлүгүн өнүктүрүүгө мүмкүнчүлүк алышты. Бул тууралуу Эмгек, социалдык камсыздоо жана миграция министрлиги билдирет.

Анын ичинен:

• программага катышкан аялдардын жалпы саны-12 272;
• үй-бүлө мүчөлөрүнүн жалпы саны - 70 880;
• майыптардын жалпы саны-1 436;
• 16 жашка чейинки балдардын саны – 33 079.

Жыйынтыгы боюнча бир жарым жылдан дээрлик 13 миң муктаж үй-бүлө “үй-бүлөгө көмөк” жөлөкпулунан баш тарткан.

Бүгүнкү күндө дээрлик 13 миң бизнес-долбоордун ичинен 17 адам гана катуу оорудан жана башка форс-мажордук жагдайлардан улам долбоорду аягына чыгара алган жок. Калган катышуучулар эбегейсиз эрктин жана берилгендиктин, уюштуруучулук жана башкаруучулук жөндөмдүн мисалын көрсөтүшөт.

Программанын 12 миң 800 катышуучусунун 95,8%ы негизинен айыл жеринде жашаган аялдар. Анын үстүнө бул тенденция бардык аймактарда байкалууда.

Региондордо “Социалдык контракт” программасын ишке ашыруу бүгүнкү күндө аялдар үй-бүлө экономикасын калыптандырууда алдыңкы позицияда экенин айкын көрсөтүп турат.

Үй-бүлө мүчөлөрүнүн биринин “Социалдык контракт” программасына катышуусу автоматтык түрдө бүт үй-бүлөгө таркатылгандыктан, ишкердик иш жүргүзүүдөн түшкөн киреше үй-бүлөнүн муктаждыктарына жумшалгандыктан, 2022 жана 2023-жылдары 70 миң адамдын жашоо деңгээлин жогорулатуу жөнүндө айтууга болот.

2022 жана 2023-жылдардагы социалдык контракттын катышуучуларынын бизнес-пландарынын багыттары боюнча төмөнкү түзүм берилген:

- 71% Айыл чарба тармагында (68% - мал чарбачылыгы, калганы – өсүмдүк өстүрүү, аарычылык, күнөскана, канаттуулар чарбасы);

– 16,4% – өндүрүш (15% - Тигүү иши, калгандары – темир-бетон буюмдарын жана терезелерди даярдоо, самын жасоо, кургатылган жемиштерди өндүрүү, Эмерек цехи жана майдалагыч);

- 6,4% - кызмат көрсөтүү (коомдук тамактануу жана такси кызматтары, курулуш-монтаждоо жана турмуш-тиричилик кызматтары, кондитердик азыктарды даярдоо, СБ, сулуулук салондору, авто диагностикалык борборлор, массаж);

– 6,2% – соода (майда соода, дарыкана).

Министрлик 2024-жылы республикалык бюджеттен 2 млрд сом бөлүү менен 20 000 үй-бүлөгө социалдык контрактты берүүнү пландоодо.