Бишкек, 22.08.24. /Кабар/. Бишкек – Кант унаа жолунун 12 чакырым аралыгына асфальт төшөө пландалууда. Бул тууралуу Транспорт жана коммуникациялар министрлигинин маалымат кызматынан билдиришти.
Маалыматка ылайык, капиталдык оңдоодон өткөрүү муктаждыгы жаралган Бишкек – Кант унаа жолун талапка ылайык келтирүүгө министрликтин алдында атайын комиссиялык топ түзүлүп, "Кыргызжолтрансдолбоор" долбоорлоо жана изилдѳѳ институтуна жолдун долбоорун жана сметалык документациясын иштеп чыгуу тапшырмасы берилген. Анын жыйынтыгы менен жолдун 9-21,5-чакырым аралыгын, тагыраагы 12,5 чакырымын асфальттоо пландалууда.
"Алдыда этап-этабы менен Бишкек – Кант, андан соң Кант – Токмок жолдорун (каржы маселесинин чечилишине жараша) оңдоо иштери жүрөт", - деп айтылат маалыматта.
Белгилей кетсек, учурда элге ыңгайлуу шарт түзүү максатында Бишкек – Кант унаа жолунда аң-чөнөктөрдү жамоо иштери аткарылды.
Пикир
Оставить комментарий