• 87.96
  • 95.21
  • 0.97

Бишкекте БАЭнин 20дан ашык алдыңкы компаниялары катышкан бизнес-форум өтүүдө

Экономика 0

Бишкек, 20.03.23./Кабар/. Бишкекте бүгүн "Кыргызстан–БАЭ" бизнес-форуму өтүп жатат. Бул тууралуу Кыргызстандын Соода-өнөр жай палатасынын маалымат кызматы билдирет.

Форумдун ишине саламаттыкты сактоо, туризм, курулуш, товарлардын экспорт-импорту жана тамак-аш, косметика, меймандостук, акыркы инженердик жана технологиялык чечимдер, электр техникасы сыяктуу тармактарда кызматташууну түзүүгө даяр болгон БАЭнин 20дан ашык алдыңкы компаниялары катышууда.

Ошондой эле иш-чаранын алкагында Кыргызстан менен БАЭ ортосундагы логистикалык жана банктык операциялар боюнча талкуулар жүргүзүлүп, ата мекендик өндүрүш ишканасына баруу болду.

КРнын Соода-өнөр жай палатасынын жетекчиси Темир Сариев белгилегендей, акыркы эки жылда бул эки өлкөнүн ишкер чөйрөлөрүнүн ортосунда өткөрүлгөн төртүнчү форум жана бул өз ара кызыкчылык, келечек жана мүмкүнчүлүктөрдөн кабар берет. Бул келечекте жакшы салтка айланышы керек.

«Соода-өнөр жай палатасынын алдында ар кандай комитеттер, анын ичинде Инвестицияларды коргоо жана илгерилетүү боюнча комитет иштейт. Мен БАЭ компанияларына кайрылгым келет – биз Кыргызстандын экономикасын өркүндөтүү, эл аралык мамилелерди өнүктүрүү жана инвесторлордун укуктарын коргоо үчүн иштейбиз”, - деп баса белгиледи Темир Сариев.

2022-жылга карата Кыргызстан менен БАЭ ортосундагы товар жүгүртүү 125 миллион АКШ долларын түздү, бул 2021-жылдын ушул мезгилине салыштырмалуу 80%га көп.

2022-жылга карата Кыргызстандан БАЭге экспорт 101 миллион АКШ долларын түздү, бул 2021-жылдын ушул мезгилине салыштырмалуу 84%га көп. 2022-жылга БАЭден Кыргыз Республикасына продукциянын импорту 25 миллион АКШ долларын түздү, бул 2021-жылдын ушул мезгилине салыштырмалуу 66%га көп.

Форумду Кыргызстандын Соода-өнөр жай палатасы жана Дубай биргелешип, КРнын Тышкы иштер министрлигинин көмөгү менен уюштурган.

Пикир

Оставить комментарий