Бишкек, 3-апрель /Кабар/. Кыргызстандагы Бүткүл дүйнөлүк сулуулук конгресси «Дунган мисси-2017» сынагына кастинг жарыялады.
Бүткүл дүйнөлүк сулуулук конгрессинин Кыргызстандагы өкүлчүлүгүнүн директору Амина Юсурова билдиргендей, кастинг 3-20-апрелде өтөт. Ага дунган улутундагы, жашы 16дан жогору, коммуникабелдүү жана артисттик таланты бар, команда менен иштөөгё жөндөмдүү кыздар чакырылат.
“Дунган мисси-2017" сулуулук сынагы “Кыргызстан дунгандарынын Ассоциациясы” жана Бүткүл дүйнөлүк сулуулук конгресси тарабынан уюштурулууда. Иш-чара КРдагы Адеп, ыйман жана маданият жылына арналган”, - деп белгиледи А.Юсурова.
«Дунган мисси» – бул дунган диаспорасынын мыкты өкүлдөрүн бириктирген, 3 жылда 1 жолу өтүүчү сынак. Катышуучулары калыстар тобуна сулуулугун гана эмес, чыгармачылык таланттарын, интеллектуалдык жөндөмдүүлүгүн жана элинин каада-салттарын, тарых жана маданиятын билүүсүн көрсөтүшөт.
Бул кызыктуу шоуда көрүүчүлөр кыргыз, дунган эстрадасынын жана шоу-бизнес жылдыздарынын катышуусунда көркөм программага күбө болушат. Эң татыктуулары Кыргызстанды эл аралык сулуулук сынактарына көрсөтщлөт, деп айтылат билдирүүдө.
Сынактын программасында:
1. Катышуучулардын улуттук кийим менен чыгуусу,
2. Бий,
3. Дунган тамак-аштарын даярдоо,
4. Кече көйнөктөрү,
5. Дунган фольколору сынагы – макал-лакаптарды, ырларды, тамсилдерди жана жомокторду көркөм окуу.
Сынактын максаты – дунган элинин маданиятын жана салтын, Кыргызстан эли менен толеранттуулугун жана тилектештигин жайылтуу. Сынактын тапшырмаларына үй-бүлөнүн социалдык ролун жогорулатуу жана келечек муунду адептүүлүккө тарбиялоо, сергек жашоо образын жайылтуу, улуттар аралык байланыштарды бекемдөө жана өнүктүрүү болуп саналат.
Сынак 2017-жылы 22-майда “Кайнар” ресторанында өтөт.
Иш-чара КР Маданият, маалымат жана туризм министрлигинин маалымат жана массалык коммуникациялар департаментинин колдоосу менен өткөрүлүүдө.
Пикир
Оставить комментарий