Бишкекте «Кырк Уруу Жети Дубан» кыймылынын лидери жана анын тарапташтары кармалды

Бишкек, 01.10.20. /Кабар/. Бишкекте милиция аймактар аралык кастыкты козутуу жана бийликти күч менен басып алууга чакырык жасашкан «Кырк Уруу Жети Дубан» кыймылынын лидерин жана анын тарапташтарын кармады. Бул тууралуу КР Ички иштер министрлигинин басма сөз кызматы билдирет.

Маалыматка ылайык, 2020-жылдын 30-сентябрь күнү коомдук тартипти туруксуздаштырууну мерчемдешип, бийликти күч менен басып алууга чакырган видео интернет булактарында тараган.

Аталган факты боюнча Бишкек шаарынын ИИББдин Тергөө кызматы Кылмыштардын жана жоруктардын бирдиктүү реестрине Кыргыз Республикасынын Жазык кодексинин 313-беренесинин 2-бөлүмүндө («Расалык, этностук, улуттук, диний же региондор ортосундагы кастыкты («араздашууну») козутуу») көрсөтүлгөн кылмыш белгилери боюнча сотко чейинки өндүрүштү башташкан.

Кыргыз Республикасынын Улуттук Академиясы тарабынан берилген соттук-саясий экспертизасынын корутундусуна ылайык, интернет булактарына таралган видео тасмада сүйлөгөн белгисиз жарандын сөзүндө региондор ортосундагы кастыкты («араздашууну») козутууга жана бийликти күч менен басып алууга ачык чакырыктар белгиси бар экендиги аныкталган.

Сотко чейинки өндүрүш ишинин жүрүшүндө видео тасмадагы адамдардын өздүгү аныкталып, 2020-жылдын 30-сентябрь күнү «Кырк Уруу Жети Дубан» кыймылынын 26 мүчөсү кармалып, Бишкек ШИИББнын Тергөө кызматына жеткирилген.

26 жаранга тең наркологиялык изилдөө жүргүзүлүп, анын жыйынтыгы менен 20 жаран баңги каражатын колдонгондугу аныкталган.

Сотко чейинки өндүрүштүн алкагында Кыргыз Республикасынын Жазык кодексинин 313-беренесинин 2-бөлүмүндө көрсөтүлгөн кылмыш белгилери боюнча «Кырк Уруу Жети Дубан» кыймылынын лидери Кыргыз Республикасынын ЖПКнын 98-беренесине ылайык Бишкек шаардык милициянын убактылуу кармоочу жайына киргизилди:

1. 1985 –жылы туулган Шамиль Муканбаев, мурда соттолгон;

2. 1971-жылы туулган Амангельди Артыков, мурда баңгизатты сактагандыгы үчүн эки жолу соттолгон;

3. 1964-жылы туулган Акылбек Олджембаев, мурда зордуктоо жана аткезчилик менен эки жолу соттолгон;

4. 1972-жылы туулган Рыскелди Бериков;

5. 1966-жылы туулган Кубанычбек Джумаканов, мурда тоноо, ээнбаштык жана уурдоо менен үч жолу соттолгон.

«Башка камсыз болгон адамдардын окуяга тиешелүүлүгүн аныктоого багытталган тергөө жана ыкчам иликтөө иштери жүргүзүлүп, баардык тиешелүү экспертизалар дайындалып тергөө улантылууда», - деп кошумчалашты ИИМден.