Бишкек, 01.02.22. /Кабар/. Бишкекте рейддик иш-чаранын жүрүшүндө түнкүсүн көчөдө жүргөн 17 өспүрүм аныкталды. Бул тууралуу Ички иштер министрлигинин басма сөз кызматы билдирет.
Маалыматка ылайык, 2022-жылдын 31-январь күнү ИчИМдин Жашы жете электердин арасындагы укук бузуулардын алдын алуу борборунун кызматкерлери тарабынан «Өспүрүм-Түн» аттуу ыкчам-алдын алуу иш-чарасы жүргүзүлдү.
«Кыргыз Республикасында балдардын ден соолугуна, дене бой, интеллектуалдык, психикалык, руханий жана адептик өнүгүүсүнө зыян келтирүүнүн алдын алуу боюнча чаралар» жөнүндөгү КР мыйзамынын негизинде түнкү убакта (саат 22:00дөн эртен мененки саат 06:00гө чейин) балдар: көчөдө, соода жана коомдук тамактануу жайларында, парктарда, аянттарда, вокзалдарда, түнкү жана интернет клубдарда ата-энелери же аларды алмаштырган адамдардын коштоосуз жүрүүгө тыюу салынат.
Иш-чаранын максаты – кыштын суук күндөрү, түн ичинде мыйзамдуу өкүлдөрүнүн коштоосу жок жүргөн, балдар мекемелеринен өз алдынча кетип калган, мамлекеттин жардамына муктаж балдарды аныктоо, аларга социалдык жактан жардам көрсөтүү.
Рейддик иш-чаранын жүрүшүндө мыйзамдуу өкүлдөрүнүн коштоосу жок жүргөн 17 бала аныкталды. Аныкталган балдарга жеринен ата-энелери чакыртылып, андан ары тарбиялоо жана көзөмөлдөө боюнча түшүндүрүү иштери жүргүзүлүп, балдар ата-энелерине тапшырылып берилишти.
Пикир
Оставить комментарий