Бишкектеги кайра шайлоо: Бюллетендер кол менен толук саналып бүттү

Бишкек, 28.02.22. /Адил Төлөгөнов - Кабар/. Бишкектин №27 Биринчи май жана №29 Свердлов шайлоо округу боюнча Жогорку Кеңештин депутаттарын кайра шайлоодогу добуштарды кол менен эсептөө аяктады.

Ага ылайык:

Биринчи май округу боюнча:
Эльвира Сурабалдиева — 47,97%;
Нурбек Тотонов — 18,43%;
Нурбек Токтакунов — 5,55%.

Свердлов округу боюнча:
Абдурахманхаджи Муртазалиев — 19,52%;
Шайлообек Атазов — 18,10%;
Аскар Алмаз уулу — 14,06%.

Ал эми жалпы 120 автоматтык түрдө эсептөө үкөгүнүн (АСУ) маалыматына ылайык, төмөнкү талапкерлер алдыда келе жатат:

Биринчи май округу боюнча:
Эльвира Сурабалдиева — 46,09%;
Нурбек Тотонов — 17,73%;
Нурбек Токтакунов — 5,33%.

Свердлов округу боюнча:
Абдурахманхаджи Муртазалиев — 17,54%;
Шайлообек Атазов — 16,28%;
Аскар Алмаз уулу — 12,64%.

Белгилей кетсек, БШКнын төрайымы Нуржан Шайлдабекова кайра шайлоонун акыркы жыйынтыгы 12-мартка чейин чыгарын белгилеген.

Жаңы шайлоо мыйзамына ылайык, Жогорку Кеңешке бирдиктүү шайлоо округунан пропорционалдык система боюнча 54 депутат, ал эми бир мандаттуу шайлоо округунан мажоритардык система боюнча 36 депутат шайланып келет. Жалпы 90 мандат берилет. Бирок 2021-жылдын 28-ноябрындагы парламенттик шайлоодо Биринчи май жана Свердлов округдарында “баарына каршы” графасы көпчүлүк добушка ээ болуп, кайра шайлоо 27-февралга дайындалган.

Бишкек шаарында 120 шайлоо тилкеси уюштурулду. Биринчи май районунда 60, Свердлов районунда 60 шайлоо участкасы түзүлдү.

Эки округ боюнча шайлоочулардын саны (контролдук) 219 миң 654 адамды түзөт.

Белгилей кетсек, кайра шайлоого БШК тарабынан 52 талапкер катталып, бирок Биринчи май округу боюнча эки талапкер шайлоого катышуудан баш тарткан.