Кыргызстандын бокс боюнча курамасы Таиландда өткөн Азия чемпионатынан кайтып келди

Бишкек, 16.12.24. /Кабар/. Кыргызстандын бокс боюнча улуттук курама командасы Азия чемпионатынан кайтып келди.

Дене тарбия жана спорт департаментинен билдиришкендей, спортчуларды "Манас" эл аралык аэропортунан Спорттун олимпиадалык түрлөрү боюнча дирекциясынын директору Мелис Тобокелов жана спортчулардын жакындары тосуп алды.

Белгилей кетсек, бокс боюнча улуттук курама команданын мүчөлөрү Таиланддын Чиангмай шаарында өткөн Азия чемпионатында 2 коло медаль жеңген.

60 кг чейинки салмакта Рыспек Бектенов жана 63.5 кг чейинки салмак категориясында Мирзохид Имамназаров 3-орунду ээлешти.

Азия чемпионатына 21 өлкөдөн 210 мушкер катышып, эркектер арасында 13 жана кыз-келиндер арасында 12 медалдар топтому ойнотулду.

Кыргызстандын курама командасы башкы машыктыруучу Данияр Төлөгөн уулу жана улук машыктыруучу Акыйкат Абаевдин жетекчилиги алдында мелдешке катышты.