Бишкек, 20.02.23. /Кабар/. София шаарына жакын жерде 52 качкын менен жүк ташуучу унаа табылган, алардын 18и кычкылтектин жетишсиздигинен каза болгон. Бул тууралуу Deutsche Welle билдирди.
Болгариянын прокуратурасынын маалыматына ылайык, 18-февраль күнү кечинде Софиядан 20 чакырым алыстыкта качкындар менен ташталган жүк ташуучу унааны жолдон өтүп бараткандар таап, полицияга кабарлашкан.
Айрым маалыматтарга караганда, каза болгондордун арасында 6-7 жаштагы бала бар, кээ бир маалыматтарга караганда, каза болгондордун эң кичүүсү өспүрүм болгон.
Качкындарды ташыган аткезчилер качып кетишкен. Полиция Болгариянын төрт жаранын кармады. Аман калган 34 адам ооруканага жаткырылды. Жүк ташуучу унаадагы адамдар үйүлгөн отундун артына жашынган.
Алдын ала расмий маалыматка караганда, алар Афганистандан болгон. Полициянын айтымында, 18 адам сөөктөр табылганга чейин 10-12 саат мурун каза болгон.
Белгиленгендей, соңку кезде мигранттардын Евробиримдикке Болгария аркылуу өтүү аракеттери көбөйүп, буга байланыштуу өлкө Түркия менен 234 чакырым биргелешкен чек ара тилкесинде көзөмөлдү күчөткөн.
Болгариянын Ички иштер министрлигинин маалыматы боюнча, өткөн жылы бул өлкөнүн чек арачылары чек араны мыйзамсыз кесип өтүү боюнча 164 миң аракетти токтотушкан. Мындан бир жыл мурда бөгөттөлгөн мыйзамсыз өтүүлөрдүн саны 55 миңди түзгөн, же дээрлик 3 эсе аз болгон.
Сүрөт: Dimitar Kyosemarliev/AFP/Scanpix
Пикир
Оставить комментарий