Бишкек, 13.05.20. /Кабар/. Кыргызстанда эпидемиологиялык кырдаал оңолууда. Бул тууралуу КР саламаттык сактоо министринин орун басары Нурболот Үсөнбаев өкмөт үйүндө өткөн брифинг маалында билдирди.
Өлкөнүн башкы санитардык дарыгери маалымдагандай, сутка ичинде коронавирус жуккан 7 жаңы учур табылып, жугуу жолдору аныкталган. «Жаңы учурлар байланышта болгондор арасынан табылды. Аны биз изилдөөнүн жүрүшүндө аныктадык», - дейт ал.
Министрдин орун басары кошумчалагандай, сутка ичинде аныкталган 7 бейтаптын бирөө - оор жүк ташуучу унаанын айдоочусу.
Өлкөдө коронавируска кабылгандардын дээрлик 70%ы айыгып, ооруканадан чыгарылды.
Ошондой эле Үсөнбаев кошумчалагандай, иштөөгө уруксат берилген айрым административдик аймактарда санитардык-карантиндик чаралар белгиленген.
«Жарандык жоопкерчилик пайда болууда. Бирок ошентсе да жалпы коопсуздук чараларына муктаждык бар», - дейт ал.
Андан тышкары, Үсөнбаев жарандарды өздүк гигиенаны сактоонуу суранды. «Өздүк гигиенаны сактабагандык башка адамдардын ден соолугуна зыян тийгизет. Ал эми беткап тагынып жүрүү - өзүн гана эмес, башкаларды да оору жугуудан сактайт», - деп баса белгиледи ал.
Белгилей кетсек, Кыргызстанда 13-майга карата коронавирус жуктурган 7 жаңы учур катталды. Азыркы тапта өлкөдө коронавирус жуктурган учурлардын саны 1044тү түзөт. Алардын ичинен 726 адам коронавирустан айыгып, ооруканадан чыгарылган. Коронавирус жуктурган 12 адам каза болду.
Пикир
Оставить комментарий