Бишкек, 24.01.20. /Кабар/. Кыргызстандын футзал боюнча кыздар курамасы (19 жашка чейин) CAFA-2020 чемпионатындагы биринчи беттешинде Афганистандын курамасын жеңип алды. Бул тууралуу КР Футбол федерациясынан билдиришти.
Оюн 3:0 эсебинде аяктаган. Оюнда голду Айтурган Аскарова, Кенже Ырысбек кызы жана Бактыгүл Токтоболотова киргизген.
Кыргызстандын улуттук курамасы футзал боюнча (19 жашка чейин) CAFA-2020 чемпионатына алгачкы ирет катышууда. Мелдеш Душанбе шаарында (Тажикстан) 24-29-январь күндөрү болуп өтөт. Жарыш 19 жашка чейинки кыздар арасында өтүүдө.
Мелдешке Кыргызстандан тышкары, Тажикстан, Өзбекстан, Түркмөнстан, Иран, Афганистандын курамалары катышууда.
Эртең, 25-январь күнү Кыргызстандын спортчулары Өзбекстандын курамасы менен оюн өткөрөт.
Пикир
Оставить комментарий