Бишкек, 12.04.22. /Кабар/. Чүй облусунда социалдык тармак аркылуу экстремисттик материалдарды тараткан “Хизб ут-Тахрир” диний-экстремисттик уюмунун активдүү жактоочусу кармалды. Бул тууралуу Чүй облустук милициясынын басма сөз кызматы билдирет.
Маалыматка ылайык, тиешелүү ыкчам иш-чаралардын жүрүшүндө Чүй ОИИББи жана Аламүдүн РИИБнин Экстремизмге жана мыйзамсыз миграцияга каршы аракеттенүү боюнча кызматтарынын кызматкерлери «Фейсбук» социалдык тармагында «Хизб ут-Тахрир» диний-экстремисттик уюмунун материалдарын таратып жүргөн А.К. аттуу колдонуучунун аккаунтун аныктаган.
Жүргүзүлгөн экспертизанын корутундусу менен ал тараткан материалдарда тыюу салынган идеологиянын мазмуну бар экендиги тастыкталган.
Таратууга шектелип, «Хизб ут-Тахрир» ДЭУнун идеологияларынын активдүү жактоочусу, 48 жаштагы А.М. аттуу жаран аныкталган. Анын социалдык тармакка катталып, колдонуп жүргөн уюлдук телефону алынган. Ага карата КР Кылмыш-жаза кодексинин 332-беренеси “Экстремисттик материалдарды даярдоо жана жайылтуу” боюнча кылмыш иши козголгон.
Учурда тергөө иштери уланууда.
Пикир
Оставить комментарий