Бишкек, 18.06.19. /Кабар/. Чалдыбар айылында өспүрүмдөр арасында болгон мушташтын уюштуруучулары кармалды. Бул тууралуу Чүй облусунун ички иштер башкармалыгынын басма сөз кызматынан кабарлашты.
Маалыматка ылайык, 16-июнь күнү болжол менен 01:50лөр чамасында милицияга жаракат алып аймактык ооруканага түшкөн өспүрүмдөр тууралуу билдирүү түшкөн. Ыкчам топ ооруканага барган.
Ооруканадагы балдардын өздүгү аныкталган: алар 18 жаштагы К.А., 17 жаштагы А.Н., 17 жаштагы А.А., 18 жаштагы К.Н., жана 18 жаштагы А.С. аттуу Чалдыбар айылынын тургундары болушкан.
Белгилүү болгондой, 16-июнда түнкү саат 00:30дар чамасында бир нече жаш балдардын ортосунда жаңжал чыгып, жыйынтыгында беш өспүрүм ар түрдүү жаракаттарды алган.
Аталган факт Кылмыштар жана жоруктардын бирдиктүү реестринде катталган.
Ыкчам-тергөө иш-чараларынын жыйынтыгында мушташка тиешеси бар бир нече жарандар аныкталып, райондук милиция бөлүмүнө жеткирилген. Аталган жаңжалдын уюштуруучулары катары 19 жаштагы Т.Б. жана Б.Д. аттуу балдар кармалып, убактылуу кармоочу жайына киргизилген.
Пикир
Оставить комментарий