Бишкек, 19.07.20. /Кабар/.Чоң-Алай районунда жаандан улам каналдардан суу ашып, турак үйлөргө кирген. Бул тууралуу Өзгөчө кырдаалдар министрлигинин басма сөз кызматы билдирет.
Маалыматка ылайык, Ош облусунун Чоң-Алай районунда 18-июль күнү саат 19:30 чамасында жааган жамгырдын кесепетинен Чоң-Алай айыл аймагында каналдардан суу ашып, Дароот-Коргон айылындагы 8 турак үйдүн короосун, Кызыл-Эшме айылындагы 5 турак үйдүн короосун суу каптаган жана Беш-Кашар тилкесинде жайгашкан 1 турак үйдүн ичине суу кирген.
Жерине КР ӨКМнин Чоң-Алай райондук бөлүмүнөн ыкчам топ жана айыл аймактан 2 экскаватор, 1 жүктөгүч тартылган.
Тартылган күчтөрдүн аракетинде 1 турак үйдүн ичи толугу менен тазаланган жана каналдарды тазалоо иш-чаралары жүргүзүлгөн. Ал эми сел суулары кирген турак үйлөрдүн ээлери короолорун өздөрү тазалап алышкан.
Бүгүн, 19-июлда сел өтүүчү каналдарды калыбына келтирүү иш-чаралары улантылууда.
Белгилей кетсек, Кыргызгидромет 18-19-июлда Ош облусунун тоо этектеринде жана тоолуу райондорунда сел жүрүү коркунучу боюнча шашылыш эскертүү тараткан.
Пикир
Оставить комментарий