Бишкек, 01.10.24. /Кабар/. Кыргызстандын футбол боюнча улуттук курама командасы октябрдагы беттештерге даярдыгын баштады. Бул тууралуу Кыргыз футбол биримдигинен билдиришти.
Маалыматка ылайык, 2026-жылы өтө турган Дүйнө чемпионатынын тандоо оюндарынын үчүнчү раундунун алкагында кыргыз спортчулары 10-октябрда Катар менен беттешет. Ошондой эле 15-октябрда өз оюн талаасында Түндүк Кореянын курамасы менен ойнойт.
Бул беттештерди утурлай Максим Лисицындын жетекчилиги алдында курама команда 3-октябрдан тартып Сауд Арабиянын Жидда шаарында окуу-машыгуу жыйынын өткөрөт.
Даярдык аяктаган соң команда биринчи беттешке катышуу үчүн 8-октябрда Катарга сапар тартат. Окуу-машыгуу жыйынына бара турган оюнчулардын тизмеси жакын арада жарыяланары айтылды.
Пикир
Оставить комментарий