ЕЭК Коллегиясынын төрагасы, ШКУ жана ЖККУ башкы катчылары Жапаровду туулган күнү менен куттукташты

Бишкек, 06.12.21. /Кабар/. Евразиялык экономикалык комиссиянын төрагасы Михаил Мясникович Кыргыз Республикасынын президенти Садыр Жапаровду туулган күнү менен куттуктады, - деп билдирет президенттин басма сөз кызматы.

«Бүгүнкү күн Сиздин азыркы эгемендүү Кыргызстандын өнүгүшүнө, евразиялык элдердин достук жана өз ара пайдалуу кызматташтыгынын мамилелерин тереңдетүүгө кошкон зор жеке салымыңызды баса белгилөө үчүн жакшы шылтоо.

Кийинки жылы Кыргыз Республикасы Евразиялык экономикалык биримдикте төрагалык кылат.

Сиздин бай турмуштук жана саясий тажрыйбаңыз, акылмандыгыңыз жана масштабдуу ой жүгүртүүңүз топтолгон өсүү темптерин сактап калууга гана жардам бербестен, Кыргызстандын төрагалыгы алдында ЕАЭБдин мындан аркы өнүгүүсүн камсыздайт деп ишенем», — деп белгиленет Михаил Мясниковичтин куттуктоосунда.

Мындан сырткары, Шанхай кызматташтык уюмунун (ШКУ) Башкы катчысы Владимир Норов Садыр Жапаровду туулган күнү менен куттуктады.

«Сиздин даанышман жетекчилигиңиз астында Кыргыз Республикасы эл аралык аренада өзүнүн беделин бекемдеп, ишмердүүлүктүн бардык чөйрөлөрүндө мындан да жогорку натыйжаларга жетишет деп ишенем.

ШКУнун алкагында ар тараптуу кызматташтыкты өнүктүрүүгө кошкон жеке салымыңыз үчүн терең ыраазычылык билдирем», — деп айтылат куттуктоо телеграммасында.

Ал президент Садыр Жапаровго чың ден соолук жана түгөнгүс энергия, анын үй-бүлөсүнө жана жакындарына тынчтык жана бакубатчылык, ал эми Кыргызстанга гүлдөп өнүгүү каалады.

ЖККУнун баш катчысы Станислав Зась да президент Садыр Жапаровду туулган күнү менен куттуктады.

«Сиздин жетекчилигиңиз астында Кыргыз Республикасы динамикалуу социалдык-экономикалык өнүгүү жолу менен бара жатат, эл аралык аренада күчтүү жана кадыр-барктуу позицияны ээлөөдө.

ЖККУга мүчө-мамлекеттердин саясий жана коомдук чөйрөлөрү Сиздин жеке салымыңызды жана жалпысынан Кыргыз Республикасынын Евразия мейкиндигинде тынчтыкты жана туруктуулукту чыңдоодогу ролун жогору баалайт», — деп белгиленет ЖККУ Башкы катчысынын куттуктоосунда.

ЕЭК Коллегиясынын төрагасы, ШКУ жана ЖККУ башкы катчылары президент Садыр Жапаровго бекем ден соолук, түгөнгүс энергия, ал эми Кыргызстандын элине тынчтык жана гүлдөп өнүгүү каалашты