Бишкек, 24.02.23. /Адил Төлөгөнов - Кабар/. Кыргызстандык спортчу Мээрим Жуманазарова Египетте өтүп жаткан Ibrahim Moustafa эл аралык мелдешинин чейрек финалында атаандашына утулуп калды. Бул тууралуу Бириккен күрөш дүйнөсүнүн (UWW) сайтында айтылат.
Мээрим Жуманазарова кыз-келиндер күрөшү боюнча 68 кг салмакта мелдештин 1/8 финалынан баштап катышууда. Жуманазарова болгариялык Юлиана Яневаны эки упай артыкчылыгы менен жеңип, чейрек финалга чыкты. Анда америкалык Форрест Энн Молинари менен кармашып, 3:6 эсебинде жеңилүү ызасын тартты.
Эгер америкалык спортчу финалга чыга турган болсо, анда Жуманазарова коло үчүн күрөшүүгө мүмкүнчүлүк алат.
Мелдеш 21-25-февраль күндөрү Александрия шаарында өтүүдө.
Белгилей кетсек, Египеттеги эл аралык мелдеште Акжол Махмудовдун агасы Сыймык Махмудов (63 кг) жана Раззак Бейшекеев (67кг) грек-рим күрөшү боюнча коло медаль уткан.
Пикир
Оставить комментарий