Бишкек, 26.09.23. /Кабар/. Нидерланд Падышачылыгынын борбору Амстердам шаарында Эл аралык Түрк маданияты жана мурасы фонду байыркы түрк жазуусунун петроглифтерине, тамгаларына жана руникалык белгилерине арналган көргөзмө өткөрдү. Бул тууралуу фонддун маалымат кызматынан билдиришти.
Иш-чара Амстердамдагы Юнус Эмре институтунун Түрк маданият борборунда Фонддун Азербайжан, Казакстан жана Түркиянын Нидерланд Падышачылыгындагы элчиликтери менен кызматташуусунун алкагында өттү.
Долбоор түрк элдерине таандык байыркы жазууларды изилдөө жана жайылтуу, ошондой эле аларды кеңири аудиторияга жайылтуу максатын көздөйт.
Көргөзмөнүн ачылыш аземинде сөз сүйлөгөн Эл аралык Түрк маданияты жана мурасы фондунун президенти Гүнай Эфендиева уюмдун ишмердүүлүгү күн сайын түрк элдеринин бай маданий мурастарын изилдөө, сактоо жана жайылтуу багытында кеңейип жатканын белгиледи. Гүнай Эфендиева жалпы түрк маданиятынын ажырагыс бөлүгү болгон байыркы түрк жазуусунун адамзат цивилизациясынын өнүгүшүндөгү маанилүү ролуна токтолду. Ал байыркы түрк жазууларынын петроглифтери, тамгалары жана руна белгилерине арналган көргөзмө Эл аралык Түрк маданияты жана мурасы фонду баштаган масштабдуу долбоордун бир бөлүгү экенин белгиледи. Гүнай Эфендиева белгилегендей, көргөзмө байыркы доорлордогу уникалдуу искусство үлгүлөрү менен катар жалпы түрк идеяларынын заманбап көркөм ишке ашырылышынын туюндурмасы болуп саналат.
Фонддун президенти көргөзмө түрк элдеринин ортосундагы байланышты чыңдоого, Европа мейкиндигинде алардын тарыхый-маданий мурастары тууралуу кеңири маалымдуулукту түзүүгө жана маданияттар аралык алмашууга салым кошоруна ишенимин билдирди.
Иш-чарада сөз сүйлөгөн Азербайжан Республикасынын Нидерланд Падышачылыгындагы элчиси Рахман Мустафаев, Казакстан Республикасынын Нидерланд Падышачылыгындагы элчиси Аскар Жумагалиев, Нидерланд Падышачылыгындагы Түркия Республикасынын элчиси Селжук Унал, Амстердамдагы Юнус Эмре институтунун жетекчиси Адыл Акалтун азыркы доордо түрк элдерин бириктирген байыркы жазма мурастарды изилдөөнүн маанилүүлүгүн баса белгилеп, Эл аралык Түрк маданияты жана мурасы фондунун бул багыттагы ишмердүүлүгүн жогору баалашты.
Көргөзмөдө түрк өлкөлөрүн чагылдырган байыркы түрк жазма эстеликтеринин прикладдык искусство чеберлери – Санжар Жубанов (Казакстан), Жумагул Ташиев (Кыргызстан) жана Сабит Гурбановдун (Азербайжан) эмгектери коюлуп, мастер-класстар өткөрүлдү. Көргөзмөнүн жүрүшүндө «Улы Будын» коомдук бирикмесинин жетекчиси Меруерт Курмангалиева жана адис Даир Кыдыргалиулы (Казакстан) лекция окуп, катышуучуларга байыркы руникалык жазуулар тууралуу маалымат беришти.
Көргөзмөгө Нидерланд Падышачылыгында аккредитацияланган дипломатиялык корпус, диаспора өкүлдөрү, илим жана маданият ишмерлери, түрколог окумуштуулар жана массалык маалымат каражаттарынын өкүлдөрү катышты.
Пикир
Оставить комментарий