Эльвира Сурабалдиева: “Өкмөт саясий эрктүүлүктү көрсөттү”

Өткөн жумада парламент комитеттеринде Өкмөттүн 2018-жылдагы ишмердүүлүгү тууралуу отчетун талкуулоо башталды. Жогорку Кеңеш Өкмөттүн ишмердүүлүгү тууралуу баасын 25-апрелдеги пленардык жыйынында берүүсү күтүлүүдө, бирок, комитеттердеги талкуулар көрсөткөндөй, эл өкүлдөрүнүн көпчүлүк бөлүгү өздөрүнүн позициясын эмитен эле аныктап алышты, алар өкмөт отчеттук мезгилде жемиштүү, натыйжалуу жана эффективдүү иштеди деп эсептешет. Өкмөттүн отчету тууралуу Жогорку Кеңештин экономика жана фискалдык саясат комитетинин мүчөсү Эльвира Сурабалдиева өз пикирин бөлүштү.

Эльвира Жыргалбекова, жакынкы күндөрдө сиздер Өкмөттүн ишине баа берген турасыздар...
Ооба, парламент комитеттеринде алгачкы баалар айтыла баштады. Өкмөткө суроолор көп, алар пленардык жыйында да көп болоору анык. Айрыкча, акыркы окуяларды эске алганда...
Муну менен эмне айткыңыз келет?
Мен, мисалы алганда, кыргыз-казак чек арасындагы эки жумага созулган курч окуяларды айтып жатам.
Бир гана Казакстан эмес, биздин башка да чек араларда дайыма маселелер жаралып, экономиканын субьектилерине, карапайым жарандардын турмушуна тескери таасирин тийгизип келет. Ар бир жолу адаттагыдай эле Өкмөттү айыптап жатып калышат...
Не дейбиз, Өкмөттүн шыбагасы ушундай да. Коомчулук мамлекеттер аралык мындай кыйчалыш кырдаал дароо эле же күч менен чечиле койбосун дайыма эле түшүнө бербейт. Ошондой эле мындай учурлар эл алдында ачык талкууланбайт. Сүйлөшүүлөр дагы жабык эшиктин артында өтөт, өзүнүн позициясын жана кызыкчылыгын коргой турган учур дагы ошол жер.
Бул жагынан Өкмөттө ийгилик барбы?
Мен өкмөт саясий эркин көрсөтө алды деп эсептейм. Сиздер ЕЭКтен –Евразия экономикалык союзунан биздин өкүлдөрдү чакыртып алуу тууралуу билдирүүгө көңүл бурдуңуздарбы? Бул чет өлкөлөрдөн өз элчисин чакырып алууга барабар болгон, өтө олуттуу кадам эле. Бул деген биздин Өкмөтүбүз сүйлөшүүлөрдө маселени кабыргасынан коюп, ушул билдирүүсү менен биз саясий нааразычылыгыбызды туюндурдук дегенди билдирет. Менимче, коңшулар менен ачык жана маанилүү сөз болуп өткөн. Мага жакканы, Мухаммедкалый Абылгазиевдин Өкмөттүн акыркы жыйынындагы билдирүүсүнөн 2 күндөн кийин, кырдаал жөнгө салына баштагандыгы болду.
Бизде ар жылы жазында Өкмөттүн отставкасы тууралуу айтыла баштайт эмеспи...
Мындай билдирүүлөрдү таптакыр кабыл алалбайм. Адамдар реалдуу кырдаалга ыңгайлашып үлгүрүп, команда калыпка түшүп иштей электе эле минте бергенибиз жакшы эмес. Эми ойлоп көргүлөчү: Кыргыз Республикасынын эгемендигине 28 жыл болду, а бизде 30чу Өкмөт иштеп жатат. Мен жакында Тажикстанда болдум. Ал жакта менин маектештерим жыл сайын эле өкмөтүңөрдү алмаштыра берген адатыңар бар деп таң калышты. Бул деген экономикага туруксуздук алып келет. Бул деген Өкмөт тарабынан инвестерлорго гарантия берилбейт дегенди туюндурат.
Сөзүңүзгө караганда, Өкмөттүн ишмердүүлүгүнө карата суроолоруңуз бар көрүнөт?
Менин Өкмөттүн айрым өкүлдөрү боюнча суроолорум бар. Менин жана коллегаларымдын пикири боюнча, алар өз милдеттерин аткара албай жатышат. Ал эми жалпы алганда өкмөткө, анын азыркы курамына ийгилик гана каалаймын, алардын иштегенине бир гана жыл болбодубу. Негизи эле дүйнөлүк коомчулукка, биз туруктуу өлкө экенибизди, саясий кыйчалыштардан чочулабай биз менен кызматташса, экономикага инвестиция салса боло турганын көрсөтүүгө мезгил келди окшойт.