Бишкек, 6-июль /Кабар/. Тажикстандын президенти Эмомали Рахмон CASA-1000 долбоорунун катышуучуларынын саммитинде Борбордук Азиядан Түштүк Азияга электр энергиясын экспорттоого багытталган аймактык долбоорду ишке ашыруу аракеттерин сынга алды. Жыйынга Ооганстандын президенти жана Пакистан менен Кыргызстандын өкмөт башчылары катышууда.
Мамлекет башчы долбоорду ишке ашыруу белгиленген мөөнөттөрдөн артта калып жатканын айтты. Рахмондун билдиришинче, айрым эсептөөлөр боюнча долбоордун кечеңдешинен улам ага мүчө өлкөлөр жыл сайын 500 миллион АКШ долларын жоготуп жатышат.
Буга байланыштуу Эмомали Рахмон чечим кабыл алууга укуктуу расмий адамдардын жыйынын тез-тез өткөрүп турууну сунуштады.
Тажик президенти электр өткөрүү линияларынын негизги бөлүгү Ооганстандын аймагында жайгашканын эске алып, андагы курулуш иштерин баштоо боюнча Кабулдун аракеттерин колдоону сунуштады.
CASA-1000 долбоорунун башталышына арналган расмий салтанат былтыр майда Тажикстанда өткөн. Кыргызстан, Тажикстан, Ооганстан жана Пакистан өлкөлөрүн бириктире турган жогорку чыңалуудагы электр линиясын куруу долбоорунун жалпы баасы 1,17 млрд долларга жакын каражатты түзөт. Ал бир катар донорлор жана европалык банктар тарабынан каржыланууда. Долбоор ишке ашса Түштүк Азия өлкөлөрү Тажикстан менен Кыргызстандан жыл сайын 5 миллиард киловатт саат электр энергиясын алып турат деп күтүлүүдө.
Булагы: CENTRAL ASIAN
Пикир
Оставить комментарий