Футбол талаасы, чуркоо аянтчасы кеңейтилет. Өмүрзаков стадионун оңдоо кызуу жүрүүдө

Дөлөн Өмүрзаков атындагы стадион – Бишкекте эл аралык мелдештерди кабыл ала турган жалгыз жай. Ал 1939-жылы курулуп баштап, 1941-жылы эксплуатацияга берилген. Ал убакта стадиондун аты “Спартак” деп аталчу. Эгемендүүлүктү алгандан кийин Дөлөн Өмүрзаков атындагы стадион болуп өзгөрүп, андан бери футбол талаасында улуттук кураманын бир нече оюндары өттү. Футбол талаасы акыркы жолу мындан 9 жыл мурун оңдолгон. Адистер стадиондо толугу менен капиталдык оңдоо иши жүргүзүлбөй келгенин айтышат. Эми спортчуларга жана күйөмандарга эл аралык талаптарга жооп берген шартты түзүү максатында, стадионду реконструкциялоо иши кызуу жүрүп жатат. Анда футбол талаасы, чуркоо аянтчасы кеңейтилип, отургучтар жаңыланат.