Бишкек, 27.11.24. /Кабар/. 2024-жылдын январь-сентябрь айларында Кыргызстандын ички дүң продукциясы (ИДП) 951,8 миллиард сомду түздү. Бул көрсөткүч 2023-жылдын ушул мезгилине салыштырмалуу 8,4%га көп. Бул тууралуу Улуттук статистика комитетинен билдиришти.
Өлкөнүн экономикасында кызмат көрсөтүү тармагы үстөмдүк кылууну улантып, жалпы ИДПнын 49,3%ын түзөт. Бирок бул тармактын үлүшү 2023-жылга салыштырмалуу азайып, 49,8%ды түзгөн. Ал эми, өнөр жай менен курулуштун салымы 21,6%дан 23,9%га чейин өстү, бул аталган тармактарда жигердүүлүктүн жогорулаганынан кабар берет. Айыл чарбасы өз кезегинде 2023-жылы 11% болсо, быйыл үлүшүн 10%га чейин кыскарткан.
6,5 миллион элдин орточо санын эсепке алганда, ИДП жан башына 132 миң сомго чейин өстү. Бул өткөн жылга салыштырмалуу 12%га көп. Ошону менен бирге, отчеттук мезгилде керектөө бааларынын индекси (КБИ) 4,8%ды түздү, бул былтыр 11,7%га салыштырмалуу инфляциянын деңгээлинин төмөндөшүн көрсөтөт. Ошол эле учурда өлкөдө жашоо минимумунун баасы 7890 сомду түзүп, былтыркыга салыштырмалуу 1,7%га өскөн.
Тышкы соода тармагында да оң өзгөрүүлөр байкалды. Экспорттун көлөмү 2,8 миллиард долларга чейин өстү, бул өткөн жылдын ушул мезгилине салыштырмалуу 28,2%га көп. Импорт да көбөйүп, былтыркыга салыштырмалуу 3,7% өсүү менен 9,3 миллиард долларга жетти.
Пикир
Оставить комментарий